Перитонитда яллиғланиш жараёнининг клиник-морфологик таҳлили

Аннотация

Мақсад. Яллиғланиш жараёнининг тарқалиши ва давомийлигига қараб, перитонит
билан оғриган беморларда қиёсий нуқтаи назардан баҳолаган ҳолда жарроҳлик аралашувларнинг тегишли ҳажмини аниқлаш ва самарадорлигини ошириш. Перитонитнинг
тарқалиши ва давомийлигига қараб қорин парда морфологик тузилмаларининг реакцияси ҳам ўрганилди.
Беморлар. И.  Иргашев номидаги Тошкент шаҳар 4-сон шаҳар клиник шифохонасининг
жарроҳлик бўлимида охирги икки йил давомида даволанган 3607 нафар беморнинг
таҳлили келтирилган (2022 йилда – 1777 ва 2023 йилда – 1830 бемор).
Натижалар. 2022 йилда 115 (6,5%), 2023 йилда эса 126 (6,9%) нафар бемор перитонит
билан ётқизилган. Перитонитнинг энг кенг тарқалган сабаби ўткир аппендицит бўлди
(2022 ва 2023 йилларда мос равишда 35,6% ва 43,6%). Тарқалган перитонит билан
оғриганлар гуруҳида ўлим даражаси юқори бўлган – 2022 йилда у 13% ни, 2023 йилда
эса 21,7% ни ташкил этди. Перитонитда қорин парданинг толали ҳамда ҳужайрали тузилмаларида морфологик ўзгаришларнинг ёмонлашиши, яллиғланиш жараёнининг давомийлиги ва даражаси билан боғлиқ.
Хулоса. Перитонитда жарроҳлик аралашувининг усули ва ҳажми унинг клиник кечишини, яллиғланиш жараёнининг давомийлиги ва тарқалишини, шунингдек, қорин парда
морфологик тузилмаларининг тегишли реакциясини ҳисобга олган ҳолда танланса, даволаш самарадорлигини ошишига олиб келади