КЎКРАК ВА ҚОРИН ЁПИҚ ШИКАСТЛАРИНИНГ ДИАГНОСТИКАСИДА FAST БАЁННОМАСИДАН ФОЙДАЛАНИШ

Аннотация

Мақсад: кўкрак ва қорин ёпиқ шикастлари билан шошилинч ҳолатда қабул қилинган беморларга тезлик билан ташхис қўйиш ва жарроҳлик тактикасини танлашда FAST (Focused Assessment with
Sonography for Trauma) баённомаси имкониятини ўрганиш.
Материал ва усуллар. Кўкрак ва/ёки қорин ёпиқ шикастланишлари бўлган 100 нафар беморда бирламчи текширув жараёнида FAST баённомаси қўлланилди. Ультрасонографик текширув (УС) натижалари ушбу беморларда интраоперацион аниқланган шикастланишлар билан солиштирилди.
Натижалар. 83 нафар беморда FAST мусбат, 17 нафарида FAST манфий натижалар қайд этилди. FAST
мусбат беморларнинг 69 тасида кўкрак қафаси аъзоларининг шикастланишлари (гемо- ва пневмоторакс белгилари), 14 нафарида эса гемоперитонеум аниқланди, шу жумладан, 9 беморда кўкрак қафаси
ва қорин бўшлиғининг қўшма шикастланиши қайд қилинди. FAST баённомасининг сезувчанлиги
100%ни, хусусийлиги 93%ни, аниқлиги 96%ни ташкил қилди. FAST баённомасини қўллаш натижасида кўкрак ва қорин ёпиқ шикастлари бўлган беморларда эксплоратив торакотомия ва лапаротомия
ҳолатларини батамом бартараф қилиш имкони яратилди.
Хулоса. Кўкрак ва қорин ёпиқ шикастларида FAST баённомасини қўллаш бирламчи текширув жараёни
вақтини тежашга, ҳар бир клиник ҳолат учун мутаносиб хирургик тактикани қўллашга имкон яратади.